比悲哀更悲哀嘅事

智者講過如果寫作都唔可以忠於自己嘅感覺,唔可以順于自己嘅意願係一件悲哀嘅事。

我哋經常都要喺唔同嘅場合,戴唔同嘅面具見唔同嘅人。

唯有透過寫作先至可以發掘最真嘅自己最純嘅直覺。

當然如果有人認同係求之不得,如果冇就唯有自己爽!

Title如有雷同，純屬刻意!

揾到更好

離咗職嘅員工同變咗心嘅男人基本上都一樣，一樣無法挽留。因為佢哋認為佢哋會揾到更好嘅!

火

甲：做人如果心中冇火,同條鹹魚有乜嘢分別?!

乙：做人有火係好,但如果過咗位,就好容易不自覺咁燒傷別人同埋自己!

保險

最近有個保險經紀朋友推銷咗份保險。

保單大致上係如果你癱咗定瓜咗，保險公司會替依家嘅公司繼續出糧畀你，確保你屋企人嘅日常生活冇影響。

而我突然有個諗法，如果我真係瓜咗，當我囡囡廿年後讀完大學，我老婆好安慰咁講：＂好在妳老竇死得早，如果唔係，佢都唔知有冇能力供妳讀完大學！＂

茶果

我不溜都唔好茶果。

尋日有同事推薦就試咗一嚿，結果都係維持原判，我真係唔鍾意食茶果。

有啲嘢，唔鍾意就唔係鍾意，冇得勉強，冇得解!

茶果啊茶果!

"唔係妳不好，係我唔識得欣賞嗻!" 呢句對白好熟，好似有人同我講過。